У кастрычніцкай перадачы адзначым наступныя тэмы: фестываль беларускай аўтарскай песні “Восеньскія зоры” і Міжнародны фестываль народнай культуры “Беларускі кірмаш у Даўгаўпілсе”, Дні беларускай культуры ў Рызе і Елгаве.

 

Фестываль “Восеньскія зоры”

Менавіта творчасць заснавальніка традыцыі турыстычнай беларускай песні Арона Крупа, ураджэнца Латвіі, натхніла Беларускае культурна-асветніцкае таварыства “Уздым” на заснаванне фестываля “Восеньскія зоры”. У выкананні Алены Маслоўскай прагучала аўтарская песня Арыка Крупа “Беларусь”, якую на беларускую мову пераклаў Станіслаў Валодзька. Паэт распавядае, як прайшоў чарговы фестываль беларускай аўтарскай песні “Восеньскія зоры”. 

 

Фестываль “Беларускі кірмаш у Даўгаўпілсе”

11-га кастрычніка ў вялікай канцэртнай зале Палаца культуры пры поўным аншлагу прайшоў XV Міжнародны фестываль народнай культуры “Беларускі кірмаш у Даўгаўпілсе”, арганізаваны Цэнтрам беларускай культуры Дома адзінства.

Штогадовы фестываль “Беларускі кірмаш у Даўгаўпілсе” сабраў аматарскія беларускія калектывы з розных гарадоў Латвіі, Літвы, Эстоніі і Польшчы. Нагадаю, мэтай фестывалю з'яўляецца захаванне і папулярызацыя культурнай спадчыны беларусаў, а таксама ўмацаванне міжкультурнага дыялогу і міжнародных сувязяў.

У гэтым годзе культурны форум прайшоў пад знакам юбілею і рэтраспектывы. Арганізатары звярнулі свой погляд у мінулае і прагарталі летапіс, як просты канцэрт за пятнаццаць гадоў, мяняючы тэмы і пашыраючы геаграфію ўдзельнікаў, развіўся да міжнароднага фестывалю беларускай дыяспары краін Балтыі. Падрабязней – у перадачы “Світанак”.

 

Дзень беларускай культуры ў Рызе

18 кастрычніка ў Рызе адбыўся традыцыйны восеньскі Дзень беларускай культуры. Свята прайшло ў Доме недзяржаўных арганізацый. Прысутных віталі старшыня Саюза беларусаў Латвіі Алена Лазарава і ганаровая старшыня Валянціна Піскунова.

У канцэрце ўдзельнічалі аматарскія беларускія ансамблі “Надзея” і “Вытокі” імя Станіслава Клімава з Рыгі, “Журавінка” з Вентспілса і “Натхненне” з Даўгаўпілса, а таксама салісты Рыгор Старавойтаў і Людміла Сінкевіч, паэты Станіслаў Валодзька і Лілія Воранава. Мастачка Надзея Ізянёва-Лаўрыновіч прадставіла выставу сваіх карцін. Адначасова працавала выстава рукадзелля.

 

Дні беларускай культуры ў Елгаве    

“Ночка цёмная” – адна з любімых песень ансамбля “Лянок” Елгаўскага беларускага таварыства “Лянок”, які вось ужо ў 19-ы раз ладзіў Дні беларускай культуры. Як адзначае старшыня аб’яднання Алена Грыслэ, “канцэрт Елгаўскага беларускага таварыства “Лянок” зноў парадаваў гледачоў сардэчнымі і маляўнічымі выступленнямі.

Выступілі ўдзельнікі таварыства, дазволіўшы кожнаму атрымаць асалоду ад беларускіх песняў, танцаў і разнастайнасці культурных традыцый. На канцэрце панавала асабліва цёплая і прыязная атмасфера, якая нагадвала аб сіле агульнасці і каханні да сваіх каранёў. “Лянок” яшчэ раз пацвердзіў сваю крэатыўнасць і прыхільнасць беларускай культурнай спадчыне”. Канцэрт Дзён беларускай культуры таварыства “Лянок” стаў прыгожай традыцыяй у Елгаве, якую штогод многія чакаюць с задавальненнем.