У ліпеньскай перадачы “Світанак” адзначым наступныя тэмы: фестываль нацыянальных меншасцей у Ліепаі, фестываль дыскусій у Цэсісе, свята Купалля ў Даўгаўпілсе.

 

III Фестываль нацыянальных меншасцей у Ліепаі

29-30 чэрвеня ў Ліепаі праходзіў 3-ці Міжнародны фестываль нацыянальных меншасцей Латвіі пад назвай “Vaļā vērti atslēdziņ’!”. У ім прынялі ўдзел больш за паўтары тысячы аматарскіх артыстаў, якія прадставілі 16 нацыянальных меншасцей.

З беларускай культурай жыхароў і гасцей Ліепаі пазнаёмілі 13 творчых калектываў з розных рэгіёнаў краіны: з Рыгі – “Вытокі”, “Надзея” і “Вытокі”, з Зэмгалэ – елгаўскі “Лянок” і екабпілская “Завіруха”, з Курзэмэ – ліепайская “Паўлінка”, з Латгалэ – дагдская “Аколіца” і даўгаўпілскія “Купалінка”, “Лянок”, “Паўлінка”, “Спадчына”, “Пралескі” і “Скарбніца”.

Фестываль адкрыўся яркім шэсцем. Стракатая калона прайшла ад плошчы Яніса Чакстэ да Плошчы роз, дзе вядучыя са сцэны называлі ўсе калектывы. Культурны форум стартаваў пад гімн Латвіі і прывітальныя словы міністра культуры Агнесы Лацэ.

Вакол была чувацца латышская, латгальская, руская, беларуская, украінская, польская, нямецкая, італьянская, іспанская, балгарская і нават кітайская гаворка. Канцэрты ішлі на шматлікіх гарадскіх пляцоўках.

 

Уражаннямі дзеляцца старшыня Саюза беларусаў Латвіі Алена Лазарава, старшыня Латвійскага таварыства беларускай культуры “Вытокі” з Рыгі Таіса Бачкарова, кіраўніца тэатральнай студыі “Паўлінка” Цэнтра беларускай культуры Дома адзінства з Даўгаўпілса Інэса Казлоўская.   

Але за кадрам маштабнага свята дзяржаўнага ўзроўню засталіся слёзы, сум і неразуменне тых ансамбляў нацыянальных меншасцей, каго не дапусцілі да фестывалю. Латвійскі нацыянальны цэнтр культур (LNKC), як арганізатар, адмовіў ім па палітычным артыкуле і без тлумачэння прычын. У Палажэнні фестывалю нацыянальных меншасцей з’явіўся асобны пункт – пра нелаяльныя выказванні. У культуры створаны прэцэдэнт. Трывожны прэцэдэнт, які можа даць зялёнае святло “паляванню на ведзьмаў”.

 

Х Фестываль дыскусій у Цэсісе

Напачатку ліпеня ў Цэсісе адбыўся Х фестываль дыскусій “Лампа”. На ім працавала “Палатка дрэнных суседзяў”, дзе прайшло 10 мерапрыемстваў з удзелам беларускіх палітычных бежанцаў і еўрапейскіх палітыкаў. Уражаннямі падзяліўся валанцёр Андрусь Татур, член рады Латвійскага таварыства беларускай культуры “Сьвітанак”.

 

Купальскія святы ў Даўгаўпілсе

 

Традыцыйныя купальскія святы адбыліся ў Даўгаўпілсе. Спачатку на Купалле запрасіў Цэнтр беларускай культуры. Падрабязнасці – у метадыста Марыі Памецька.

 А 6-га ліпеня, у свой дзень нараджэння, Купалле святкавала Беларускае культурна-асветніцкае таварыства “Уздым”. Ужо другі раз для свята выбралі сядзібу ў Беркенэле, дзе жыў будучы паэт Райніс, вялікі сябра беларусаў Першай Латвійскай Рэспублікі.

 

Купальскія святы ў Даўгаўпілсе атрымаліся камернымі і душэўнымі, без народнага размаху і разгулу.