У кастрычніцкай перадачы адзначым наступныя тэмы: выстава Аб’яднання мастакоў Балтыі “Маю гонар” у Рызе, Дні беларускай культуры ў Елгаве і восеньскія фестывалі ў Даўгаўпілсе.

 

Выстава карцін аб’яднання “Маю гонар”

18-га верасня ў доме “Асацыяцыі нацыянальна-культурных таварыстваў Латвіі імя Іты Казакевіч” у Рызе адкрылася выстава карцін Аб’яднання беларускіх мастакоў Балтыі “Маю гонар”. Арганізацыя штогод ладзіць свае выставы ў АНКАЛе. На гэты раз тэмай экспазіцыі стаў “Нацюрморт”. Падрабязнасці – у старшыні Васіля Малышчыца. 

Новую выставу “Маю гонар” адкрывае 24-га кастрычніка, у АНКАЛе, на Слокас, 37. Гэта асабістая выстава мастачкі Галіны Жэлабоўскай пад назвай “Акварэльныя замалёўкі”.

 

Фестываль “Восеньскія зоры” у Даўгаўпілсе

21-га верасня ў Даўгаўпілсе адбыўся VI Міжнародны фестываль беларускай аўтарскай песні “Восеньскія зоры”, які ладзіць Беларускае культурна-асветніцкае таварыства “Уздым”. Фестываль з’яўляецца адметным мерапрыемствам суполкі. Яго па праекце штогод падтрымлівала мясцовае гарадское самакіраванне. Свята прымеркавана да Дзён беларускай культуры, якія ўвосені адбываюцца ў розных гарадах Латвіі.

Святочны канцэрт адкрыла песня-прысвячэнне “Наш фестываль” на словы паэта Станіслава Валодзькі, музыку Альберта Белуся ў выкананні гурта “Натхненне”.  

У гэтым годзе на канцэрце ў Даўгаўпілсе замежныя выканаўцы не прысутнічалі, але беларусы з Іарданіі, Італіі, Польшчы і Беларусі даслалі свае віншаванні, у тым ліку музычныя, што забяспечыла фестывалю міжнародны фармат.

Як адзначыла намесніца старшыні таварыства “Уздым” і вядучая канцэрта Людміла Сінякова, “гучалі песні на розных мовах, але абавязковай умовай для ўсіх удзельнікаў было выкананне песні на беларускай мове”.

 

З першага фестывалю ў ім удзельнічаюць спевакі Віталь Міхайлоўскі, Алена Віткевіч і Валерый Ермачэнка з Даўгаўпілса, дуэт Лідзіі Знотыні і Яўгена Пашкевіча з Ліван. Кожны год пашыралася кола ўдзельнікаў, і да іх далучыліся Наталля Елізар’ева з Екабпілса, Артур Трэпша з Дагды, даўгаўпілчане Анастасія Лукашэнак, Майя Калныня і Рыгор Старавойтаў.

Упершыню на фестывалі “Восеньскія зоры” выступілі Людміла Сінкевіч з Рыгі, Алена і Аляксандр Усцінавы, Анастасія Кізэрнэ з Ліван, а таксама Аляксандр Лапа, гурт “Рандэву”, Ксенія Лукашэнак і Павел Кузьміч з Даўгаўпілса.

У фестываля “Восеньскія зоры” ёсць свая ўнікальная ніша, што робіць яго непадобным на іншыя беларускія фестывалі Латвіі – гэта менавіта беларуская аўтарская песня і сольныя выканаўцы. Нядзіўна, што гледачы шчыра апладыравалі спевакам, а канцэртныя гадзіны праляцелі хутка. 

 

Дні беларускай культуры ў Елгаве

Забіяцкая народная песня “Ночка цёмная” з’яўляецца адной з любімых у ансамбля “Лянок”. Прагучала яна і на канцэрце Дзён беларускай культуры ў Елгаве 12-га кастрычніка.

Елгаўскае беларускае таварыства “Лянок” ужо ў 18-ы раз арганізавала Дні беларускай культуры ў сваім горадзе, і заўжды атрымлівала падтрымку мясцовага самакіравання.

 

Канцэрт пад назвай “Сустрэча з родным домам” сабраў шмат гледачоў. Кожная песня ансамбля “Лянок” знаходзіла водгук у сэрцах гледачоў. Зала ахвотна падпявала вядомым песням, задумліва слухала вершы Вацлага Гераеўскага. Разам з “Лянком” былі яго сябры і парнёры: Елгаўская асацыяцыя нацыянальна-культурных таварыстваў, Рускае таварыства “Исток”, Яўрэйскае таварыства “Сімха”, салісты. Дарэчы, старшыня Елгаўскага беларускага таварыства “Лянок” Алена Грыслэ прызналася, што “разам з Улдысам Ціммам песня гучыць па-іншаму і яшчэ больш сардэчна”.

Дні беларускай культуры ў Елгаве – брэнд таварыства “Лянок”, які добра ведаюць жыхары Зэмгалэ. 

             

Фестываль “Беларускі кірмаш у Даўгаўпілсе”

Бацькоўская хата стала галоўнай тэмай XIV Міжнароднага фестывалю народнай культуры “Беларускі кірмаш у Даўгаўпілсе”, які прайшоў 12-13 кастрычніка. Культурны форум аматарскіх беларускіх творчых калектываў краін Балтыі штогод ладзіць Цэнтр беларускай культуры Дома адзінства Даўгаўпілскага дзяржаўнага гарадскога самакіравання. Мэтай “Беларускага кірмаша” з'яўляецца захаванне і папулярызацыя культурнай спадчыны і народных традыцый беларусаў.

І ў гэты раз фестываль парадаваў жыхароў і гасцей Даўгаўпілса канцэртам, выставамі карцін і восеньскіх дароў прыроды, майстар-класамі па дэкаратыўна-прыкладной творчасці.

У суботу, 12 кастрычніка, у канцэртнай зале Дома адзінства з аншлагам прайшоў гала-канцэрт, у якім прынялі ўдзел усе творчыя калектывы Цэнтра беларускай культуры: ансамбль беларускай народнай песні “Купалінка”, танцавальны ансамбль “Лянок”, тэатральная студыя “Паўлінка”, харавая капэла “Спадчына”, вакальны ансамбль “Пралескі” і дзіцячая студыя “Скарбніца”, а таксама беларускія аматарскія калектывы з розных куткоў Латвіі: “Сузор'е” (Рэзэкнэ), “Крыніца” (Лудза), “Завіруха” (Екабпілс), “Вытокі” (Рыга), “Журавінка” (Вентспілс), “Мара” (Ліепая), славянскія “Рабінушка” (Прэйлі) і “Узоры” (Ліваны). Міжнародны статус фестывалю пацвердзілі гасцявыя самадзейныя калектывы “Купалінка” (Клайпеда, Літва), “Лянок” (Талін, Эстонія), “Чырвоныя шпількі” і “Сёстры Астапчук” (Беласток, Польшча).

 

На фестывалі была прадстаўлена выстава карцін “Восеньскія матывы” Вэлты Лоцэ, выстава восеньскіх дароў і хатніх нарыхтовак беларускіх гаспадынь. Многія гледачы з задавальненнем удзельнічалі ў майстар-класах па традыцыйных рамёствах дэкаратыўна-прыкладной творчасці, з якімі іх знаёмілі майстрыхі беларускіх таварыстваў “Мара” (Ліепая), “Спатканне” (Екабпілс) і “Альтанка” (Даўгаўпілс).

Фестывальная праграма працягнулася на наступны дзень, у нядзелю. У гэты дзень у Цэнтры беларускай культуры адбылося адкрыццё выставы нацюрмортаў Аб’яднання беларускіх мастакоў Балтыі “Маю гонар”. На вернісажы былі прадстаўлены 23 прафесійныя работы дзесяці вядомых мастакоў: Вячаслава Целеша, Васіля Малышчыца, Ганны Пэйпіні, Ірыны Ятновай, Ірыны Трумпель, Лявона Жукоўскага, Ірыны Кароль, Кацярыны Осберг, Вольгі Якубоўскай і Сяргея Махнача.

З пранікнёнай прамовай выступіла старшыня Латвійскага таварыства беларускай культуры “Вытокі” Таісія Бачкарова. Паэт Станіслаў Валодзька прачытаў свае тэматычныя вершы, а музычным фонам гучалі песні ў выкананні ансамбля “Мара” і барда Анатоля Галлера. Выстава будзе даступная да 31-га снежня.

У наступным годзе фестываль “Беларускі кірмаш у Даўгаўпілсе” будзе святкаваць свой 15-ты юбілей.