Тэмы апошняй у адыходзячым 2023 годзе перадачы: сквер Францыска Скарыны ў Рызе, юбілей таварыства “Сьвітанак”, фестываль “Музычны вянок адзінства”, творчая вечарына паэта Станіслава Валодзькі і калядныя беларускія песні.

 

Сквер імя асветніка Францыска Скарыны ў Рызе

Неверагодна, але факт: на карце Рыгі з’явіцца беларускае імя - Францыска Скарыны. Ад першай просьбы беларускай дыяспары да рашэння Рыжскай думы прайшло амаль 7 гадоў. Што не атрымалася ў 2017 годзе, здзейснілася напрыканцы 2023-га. Не дазволілі вуліцу ў Старой Рызе, будзе сквер каля будынка Латвійскай Нацыянальнай бібліятэкі. Гэта вынік агульных высілкаў беларускіх суполак і Латвійскай Нацыянальнай бібліятэкі – лічыць ідэйны натхняльнік і генератар справы, мастак, кавалер Ордэна Трох Зорак Вячаслаў Міхайлавіч Целеш, які ўпэўнены, што шлях знакамітага асветніка Францыска Скарыны да еўрапейскай культуры пачайся менавіта па рацэ Дзвіна-Даўгава і праз Рыгу.

Ідэю падтрымалі кіраўнікі Латвійскага таварыства беларускай культуры “Сьвітанак”, Аб’яднання беларускіх мастакоў “Маю гонар”, Рыжскай беларускай асноўнай школы і Даўгаўпілскага Цэнтра беларускай культуры. Тэму багатай і цікавай гісторыі беларусаў Латвіі працягнем у наступным выпуску перадачы “Світанак”.

   

Латвійскаму таварыству беларускай культуры “Сьвітанак” – 35!

27 лістапада 1988 года беларусы Рыгі заснавалі першае ў Латвіі беларускае таварыства “Сьвітанак”. За 35 год грамадская арганізацыя не змяняла назвы, мэтаў, сімволікі альбо традыцый. Падрабязней – у інтэрв’ю са старшынёй Латвійскага таварыства беларускай культуры Таццянай Казак.

 

Х фестываль “Музычны вянок адзінства” у Ліванах

У Цэнтры культуры Ліванскага краю прайшоў 10-ы Міжнародны фестываль народнай песні, арганізаваны Ліванскім славянскім таварыствам “Узоры”. Юбілейны фестываль здабыў прыгожую назву - “Музычны вянок адзінства”, і сабраў рэкордную колькасць удзельнікаў – 12 аматарскіх калектываў славянскай, украінскай, беларускай, латышскай культур з Ліван, Даўгаўпілса, Екабпілса, Лудзы, Краславы і літоўскага Вісагінаса.

Гучалі спевы на розных мовах. Беларускія народныя песні прадставілі ансамблі: “Узоры”, “Купалінка”, “Крыніца”, “Рабінушка”, Сяргей Шабадалаў і “Світанак”. Падрабязнасці – у старшыні Ліванскага славянскага таварыства “Узоры” Лідзіі Знотыні.

 

Творчая вечарына паэта Станіслава Валодзькі

У даўгаўпілскім Цэнтры беларускай культуры адбылася творчая вечарына паэта Станіслава Валодзькі “Астры дабрыні”, прысвечаная прэзентацыі аднайменнага кампакт-дыска песень. Традыцыйная лістападаўская сустрэча прайшла з аншлагам.

Станіслаў Валодзька – вядомы паэт-песеннік, дзіцячы пісьменнік, член аўтарытэтных літаратурных і грамадскіх арганізацый, яго творчасць адзначана шматлікімі ўзнагародамі.

“Астры дабрыні” – новы зборнік песень, які паэт выпусціў у суаўтарстве з беларускім кампазітарам Альбертам Белусём. У яго ўвайшлі песні аб малой радзіме, бацькоўскай хаце, культурнай спадчыне продкаў, аб прыродзе, юнацтве і каханні.

Назва дыска “Астры дабрыні” глыбока сімвалічная. Астры – гэта кветкі-зоркі, якія разганяюць смутак, а дабрыня – асноўная маральная якасць чалавека. Невыпадкова ў беларускіх палісадніках абавязкова растуць астры, і дораць іх ад добрага сэрца добраму чалавеку, каб кветкі дапамаглі яму здабыць раўнавагу і аздаравіць душу.

Паважаныя слухачы, светлых Калядаў і шчаслівага Новага года, дабра, міру і згоды!