Тэмы фінальнай перадачы адыходзячага года: стагоддзе беларускай гімназіі ў Даўгаўпілсе, навіны беларускай школы ў Рызе, планы Саюза беларусаў Латвіі, мерапрыемствы беларускай абшчыны ў Ліепаі, свята беларускай песні ў Вісагінасе, беларуская саломка ў спісе ЮНЭСКА і калядныя песні.

 

100 годдзе Даўгаўпілскай дзяржаўнай беларускай гімназіі

Сто гадоў таму, 3-га снежня 1922 года, Даўгаўпілская беларуская дзяржаўная гімназія адчыніла свае дзверы мэтанакіраваным юнакам і дзяўчынам. У міжваенны перыяд Латвіі гімназія стала цэнтрам беларускага культурнага-асветнага і грамадскага руху.

Беларуская гімназія ў Даўгаўпілсе праіснавала да 1935 года, калі адукацыя на мовах нацыянальных меншасцяў была зачынена на дзяржаўным узроўні. Пра славутую старонку ў гісторыі беларускай дыяспары Латвіі нагадвае мемарыяльная дошка на будынку былой гімназіі, якую ў 1997 годзе ўсталявала мясцовае беларускае таварыства “Уздым”.    

 

Навіны Рыжскай беларускай школы імя Янкі Купалы

Напрыканцы года ў Рыжскай беларускай асноўнай школе імя Янкі Купалы жыццё пульсуе, аб чым распавядае намесніца дырэктара, настаўніца беларускай мовы і літаратуры Ганна Іванэ.         

 

Вынікі і планы Саюза беларусаў Латвіі

Напрыканцы бягучага года онлайн адбылося пашыранае пасяджэнне праўлення Саюза беларусаў Латвіі, на якім былі прадстаўлены 11 беларускіх таварыстваў. Кіраўніцтва падводзіла вынікі 2022 года і планавала працу на наступны год. Падрабязней расказвае старшыня аб’яднання Алена Лазарава.

 

Імпрэзы Ліепайскай беларускай абшчыны “Мара”

Прагучала песня “Хата бацькоў” у выкананні кіраўніцы ансамбля “Мара” Валянціны Абатуравай. Калі ліепайскія беларусы ўпершыню пачулі гэтую шчырую песню, якую напісаў і спявае саліст групы “Дразды” Віталь Карпанаў, то вырашылі: яна стане гімнам Ліепайскай беларускай абшчыны “Мара”. З тым і працавалі ўвесь год, актыўна, плённа, і зачыняюць яго цікавымі імпрэзамі і справамі, пра што распавядае член праўлення Ганна Дзюбянава.

 

Свята беларускай песні ў Вісагінасе

Тым часам беларусы Даўгаўпілса папулярызавалі беларускую культуру не толькі ў Латвіі, але і ў суседней краіне Літве. Расказвае метадыст Цэнтра беларускай культуры Марыя Памецька.

 

“Саломапляценне Беларусі” – у спісе ЮНЭСКА

У пачатку снежня добрая вестка беларусам прыйшла з Марока, дзе адбылася 17-я сесія Міжурадавага камітэта па абароне нематэрыяльнай культурнай спадчыны ЮНЭСКА. Міжнародная арганізацыя ўнесла ў рэпрэзентатыўны спіс “Саломапляценне Беларусі”. Цяпер “беларуская саломка”, якая ёсць у кожнай беларускай хаце і сям’і, з’яўляецца не толькі нацыянальным сувенірным брэндам, а яшчэ і рамяством, дэкаратыўна-прыкладной творчасцю і мастацтвам у спісе нематэрыяльнай культурнай спадчыны ЮНЭСКА.

Паважаныя слухачы Латвійскага радыё-4! Светлых Калядаў, шчаслівага Новага года, дабра, цяпла і міру!