Тэмы чэрвеньскай праграмы: выпускны баль у Рыжскай беларускай асноўнай школе імя Янкі Купалы, літаратурная імпрэза ў гонар славутага земляка Янкі Маўра ў Ліепайскай абшчыне “Мара”, Дні беларускай культуры ў Даўгаўпілсе і Рэзэкнэ. А таксама гучаць чароўныя купальскія песні напярэдадні любімых святаў Ліга і Купалля.

 

Васільковы баль у Рыжскай беларускай школе

Чэрвень радуе не толькі святам летняга сонцавароту, але і выпускнымі балямі ў навучальных установах. Як урачыстае свята прайшло ў Рыжскай беларускай асноўнай школе імя Янкі Купалы – распавядае намесніца дырэктара Ганна Іванэ.

 

Імпрэза ў гонар знакамітага земляка ў Ліепае

Ліепайская беларуская абшчына “Мара” ладзіла імпрэзы, прысвечаныя юбілею земляка, дзіцячага пісьменніка Янкі Маўра. Беларускі дом у Ліепае знаходзіцца побач з Свята-Троіцкай праваслаўнай царквой, дзе хрысцілі Івана Фёдарава. Расказвае член праўлення суполкі Ганна Дзюбянава. 

 

Дні беларускай культуры ў Даўгаўпілсе

У Даўгаўпілсе напрыканцы мая адбыліся традыцыйныя Дні беларускай культуры, якія ўключылі шэраг мерапрыемстваў: богаслужэнне ў гонар прападобнай святой Еўфрасінні Полацкай, фотавыстава «Балетныя пастаноўкі», канцэрт Дзён беларускай культуры і ў гонар 10-гадовага юбілею харавой капэлы «Спадчына», творчая вечарына паэта Станіслава Валодзькі, прысвечаную прэзентацыям новых кніг. Паэт Станіслаў Валодзька напісаў верш, які прысвяціў харавой капэле “Спадчына”, з якой супрацоўнічае не адзін год. Пра падзеі распавядае метадыст Цэнтра беларускай культуры Марыя Памецька.

 

Дні беларускай культуры ў Рэзэкне

Дні беларускай культуры таксама адбыліся і ў Рэзэкнэ, якія традыцыйна арганізуе мясцовае беларускае таварыства “Сузор’е”. Цікавыя падзеі сабралі шмат гледачоў і ўдзельнікаў: знаёмства з беларускай нацыянальнай кухней, канцэрт ““Сузор’е” збірае сяброў”, вандроўка на радзіму. Падрабязней расказвае кіраўніца суполкі Людміла Стэц.