Ліпеньскі выпуск праграмы “Світанак” падрыхтаваны пад святочна-фестывальным знакам: адбыліся фестывалі “Балтыка”, “Браслаўскія зарніцы”, “Вянок дружбы”, “Звіняць цымбалы і гармонік”, “Славянскі базар у Віцебску”, фестываль нацыянальных культур у Гродне, а таксама свята Купалля.
Фестываль “Baltica-2022” у Вентспілсе
З 6-га па 10-е ліпеня ў Рызе і розных гарадах Курзэмэ і Відзэмэ адбыліся канцэрты Міжнароднага фальклорнага фестывалю “Baltica 2022”, арганізаванага Латвійскім нацыянальным культурным цэнтрам. На прэстыжным форуме беларускую культуру Латвіі прадстаўлялі ансамбль народнай песні “Купалінка” і тэатральная студыя “Паўлінка” з Даўгаўпілса. Уражаннямі дзеліцца рэжысёрка Інэса Казлоўская.
Свята Купалля ў Даўгаўпілсе
Народнае свята беларускага Купалля ўжо стала штогадовай культурнай традыцыяй у Даўгаўпілсе. Купалле – самае любімае беларусамі свята летняга санцавароту, якое адзначаецца ў ноч з 6-га на 7-е ліпеня. Гэта магічны час яднання з прыродай, час веры ў цуды. У парку Дубровіна, пад шатамі векавых дубоў, пад зачаравальны шум фантана, і прайшло традыцыйнае гулянне “Беларускае Купалле”, якое арганізуе Цэнтр беларускай культуры.
Фармат яркага музычнага вясковага свята на ўлонні прыроды, з танцамі на траве, з песнямі без мікрафонаў, “жывыя” зносіны і актыўны ўдзел у разнастайных майстар-класах даставілі шмат пазітыўных эмоцый - і гледачам, і артыстам. Між тым Беларускае культурна-асветніцкае таварыства “Уздым” адсвяткавала Купалле па-сапраўднаму: на вёсцы, ля вады, з вогнішчам. Пра тое распавядае старшыня суполкі Іна Валюшка.
Фестываль “Славянскі базар у Віцебску”
Беларускаму класіку Янку Купале прысвечана песня ў выкананні Анатоля Ярмоленкі і ансамбля “Сябры”. Дарэчы, “зорка” Анатоля Ярмоленкі і ансамбля “Сябры” адкрыта на алеі лаўрэатаў у час 31-га Міжнароднага фестывалю мастацтваў “Славянскі базар у Віцебску”.
У гэтым годзе ў журы конкурса маладых выканаўцаў працавала латвійская спявачка Яна Клявіня, а дыпламантам конкурса эстраднай песні стала Агнія Бусіла, якую шчыра падтрымлівалі шматлікія гледачы з Латвіі. Гран-пры “Славянскага базара” атрымала прафесійны музыкант Ганна Трубецкая, Беларусь.
Свята “Браслаўскія зарніцы”
Дзеля новых песень, вопыту, сувязяў, эмоцый творчыя калектывы беларускай дыяспары Латвіі прынялі ўдзел у розных фестывалях на этнічнай радзіме. Так, ансамбль “Пралескі” з Даўгаўпілса спяваў на 55-м Міжнародным свяце традыцыйнай культуры “Браслаўскія зарніцы”. Расказвае кіраўніца Настасся Лукашэнак.
Фестываль “Звіняць цымбалы і гармонік” у Паставах
На 32-м Міжнародным фестывалі народнай музыкі “Звіняць цымбалы і гармонік” у Паставах, на Віцебшчыне, пабываў ансамбль “Журавінка” з Вентспілса. Распавядае спявачка калектыва, член праўлення беларускага таварыства “Спадчына” Алена Нарушэвіч.
Фестываль нацыянальных культур у Гродне
Ансамбль “Надзея” Рыжскага беларускага таварыства “Прамень” удзельнічаў у 13-м Рэспубліканскім фестывалі нацыянальных культур ў Гродне. Пра новы вопыт распавядае старшыня Алена Лазарава.
Фестываль “Вянок дружбы” у Бабруйску
Ансамбль “Завіруха” з Екабпілса прыняў удзел у 16-м Міжнародным фестывалі народнай творчасці “Вянок дружбы” у г. Бабруйск Магілёўскай вобласці. Пра новы выклік расказвае старшыня беларускага таварыства “Спатканне” Іна Янсанэ.
А ў прымяжовай Дагдзе прайшоў 7-ы Міжнародны фестываль беларускай песні і танца “ФЭСТ”, на які з’ехаліся творчыя калектывы беларусаў з Латвіі і Польшчы. Пра тое ў жніўні раскажа наступная праграма “Світанак” для беларускай дыяспары краіны.
Ieteikt
Latvijas Radio aicina izteikt savu viedokli par raidījumā dzirdēto un atbalsta diskusijas klausītāju starpā, tomēr patur tiesības dzēst komentārus, kas pārkāpj cieņpilnas attieksmes un ētiskas rīcības robežas.
Добавить комментарий
Добавить ответ
Чтобы оставить комментарий, Вы также можете войти в систему, используя свой профиль draugiem.lv, Facebook или X!
Draugiem.lv Facebook X